बारामती पोरकी झाली; नगरपरिषदेचा कारभार, वाढती गुन्हेगारी,आणि प्रशासनातील मनमानीबाबत नागरिकांमध्ये नाराजी बारामतीकरांचे पवार कुटुंबीयांना पत्र..!
संपादक : सुरज देवकाते
बारामती : बारामतीतील वाढती गुन्हेगारी, नगरपरिषदेचा कारभार आणि प्रशासनातील कथित मनमानीबाबत पवार कुटुंबीयांचे लक्ष वेधणारे एक पत्र सध्या सोशल मीडियावर मोठ्या प्रमाणात व्हायरल होत आहे. या पत्रातून बारामतीकरांनी आपल्या विविध समस्या मांडत पवार कुटुंबीयांनी बारामतीकडे गांभीर्याने लक्ष द्यावे, अशी मागणी केली आहे.
“दादांच्या आकस्मिक निधनामुळे बारामती खऱ्या अर्थाने पोरकी झाली आहे,” अशी भावना या पत्रातून व्यक्त करण्यात आली आहे. तसेच बारामतीतील सामान्य नागरिक अनेक प्रश्नांना सामोरे जात असून, नागरिकांच्या मनात असुरक्षिततेची भावना निर्माण होत असल्याचा दावा पत्रात करण्यात आला आहे.
काय लिहीले आहे पत्रामध्ये पहा…
आदरणीय पवार साहेब, आदरणीय सुनेत्रावहिनी, आदरणीय सुप्रियाताई, पार्थदादा, जयदादा, युगेंन्द्रदादा,जरा बारामतीकडेही लक्ष द्दया, ही नम्र विनंती. दादांच्या आकस्मिक निधनामुळे बारामती खऱ्या अर्थाने पोरकी झाली आहे, आज बारामतीतील सामान्य नागरिक अनेक प्रश्नांना सामोरे जात आहे. नगरपरिषदेचा कारभार अत्यंत असमाधानकारक पद्धतीने सुरू असल्याची नागरिकांमध्ये भावना आहे. एखादा हुकुमशहा ज्या पद्धतीने सत्ता चालवतो, त्याच पद्धतीने नगरपालिकेचा कारभार चालवला जात असल्याचे चित्र दिसत आहे. बारामतीमध्ये गुन्हेगारी वाढत आहे, नागरिकांच्या मनात असुरक्षिततेची भावना निर्माण होत आहे आणि सर्व काही एका व्यक्तीच्या नियंत्रगात असल्यासारखा एककलमी कार्यक्रम सुरू असल्याची चर्चा आहे. बारामती ही केवल एक राजकीय जागा नाही; ती शरद पवार साहेबांनी आणि पवार कुटुंबांने वर्षानुवर्षे घडवलेली विश्वासाची भुमी आहे. म्हणुनच पवार कुटुंबातील सर्व मान्यवरांना विनंती आहे की, बारामतीतील सामान्य जनतेच्या समस्या, नगरपरिषदेचा कारभार, वाढती गुन्हेगारी आणि प्रशासनातील मनमानी याकडे गांभीर्याने लक्ष द्यावे. जनतेचा आवाज ऐका…असे पत्र लिहीले आहे.
दरम्यान, हे पत्र नेमके कोणी लिहिले आहे, याबाबत अधिकृत माहिती समोर आलेली नसली तरी सोशल मीडियावर या पत्राची मोठी चर्चा सुरू आहे.
✍🏻मुख्य संपादक – सुरज देवकाते
