संपादक : सुरज देवकाते
बारामती : बारामती नगरपरिषदेचे नगराध्यक्ष व मुख्याधिकारी यांच्या सूचनेनुसार तसेच आरोग्य विभागाच्या वतीने स्वच्छता आणि पर्यावरण जनजागृती रॅलीचे आयोजन करण्यात आले. या रॅलीत बारामती नगरपरिषद शाळेतील इयत्ता पहिली ते आठवीपर्यंतच्या विद्यार्थ्यांनी उत्स्फूर्त सहभाग नोंदवत नागरिकांना स्वच्छता व पर्यावरण संवर्धनाचा संदेश दिला.
रॅलीदरम्यान विद्यार्थ्यांनी स्वच्छता, कचरा व्यवस्थापन, पर्यावरणाचे संरक्षण, प्लास्टिकचा कमी वापर तसेच परिसर स्वच्छ ठेवण्याबाबत जनजागृती केली. विद्यार्थ्यांच्या घोषणांनी परिसर दुमदुमून गेला. स्वच्छ आणि सुंदर शहरासाठी नागरिकांनीही आपली जबाबदारी ओळखून स्वच्छता अभियानात सहभागी व्हावे, असा संदेश या उपक्रमातून देण्यात आला.
या वेळी बारामती नगरपरिषदेचे गटनेते संजय संघवी, महिला व बालकल्याण सभापती सौ. सविता जाधव, आरोग्य निरीक्षक स्वरूप आहिवळे, प्रवीण अडागळे, मुकादम अक्षय बिवाल, सुपरवायझर सचिन पराचा यांच्यासह नगरपरिषदेचे अधिकारी व कर्मचारी उपस्थित होते.
शाळेचे प्रभारी मुख्याध्यापक नीलकंठ कापसे, शिक्षक बाळकृष्ण चव्हाण, शिक्षिका अश्विनी गायकवाड, विद्या जगताप, सारिका वाघमोडे, ज्योती मेथेवाड, रोहिणी निकम, आरती सोनवणे तसेच शाळेतील विद्यार्थी-विद्यार्थिनी मोठ्या संख्येने रॅलीत सहभागी झाले होते.
स्वच्छता ही केवळ प्रशासनाची जबाबदारी नसून प्रत्येक नागरिकाची सामूहिक जबाबदारी आहे. विद्यार्थ्यांच्या माध्यमातून स्वच्छता व पर्यावरण संवर्धनाचा संदेश घराघरात पोहोचविण्यासाठी या रॅलीचे आयोजन करण्यात आले. त्यामुळे विद्यार्थ्यांच्या उत्स्फूर्त सहभागामुळे रॅलीला विशेष महत्त्व प्राप्त झाले.
✍🏻मुख्य संपादक – सुरज देवकाते
