तीन मजली संग्रहालय, जनता दरबाराची प्रतिकृती आणि ५० मीटर उंचीच्या टॉवरमधून दिसणार बारामतीच्या विकासाचा आलेख
संपादक : सुरज देवकाते
बारामती (दि. २३) : बारामती नगरपरिषदेच्या मंगळवारी (दि. २३) झालेल्या सर्वसाधारण सभेत उपमुख्यमंत्री अजित पवार यांच्या भव्य स्मारक उभारणीच्या प्रस्तावाला एकमताने मंजुरी देण्यात आली. बारामतीच्या विकासाचा इतिहास आणि अजित पवार यांच्या कार्याचा प्रेरणादायी प्रवास पुढील पिढ्यांसमोर मांडणारे हे स्मारक अत्याधुनिक स्वरूपात उभारण्यात येणार असून, त्यामध्ये ५० मीटर उंचीच्या स्मारकस्तंभासह तीन मजली संग्रहालय उभारण्यात येणार आहे.
नगराध्यक्ष सचिन सातव यांनी या संदर्भात माहिती देताना सांगितले की, प्रशासकीय भवनाशेजारील जागेत उभारण्यात येणाऱ्या स्मारकातील ५० मीटर उंचीच्या टॉवरवरून बारामती शहराचा सर्वांगीण विकास अनुभवता येणार आहे. अजित पवार यांच्या विकासदृष्टी आणि राजकीय उंचीप्रमाणेच या स्मारकस्तंभाची उंचीही बारामतीतील सर्वाधिक असेल, असे त्यांनी स्पष्ट केले.
स्मारक परिसरात तीन मजली अत्याधुनिक म्युझियम उभारण्यात येणार असून, त्यामध्ये अजित पवार यांना विविध मान्यवरांकडून प्राप्त झालेल्या भेटवस्तू आणि स्मृतिचिन्हांचे जतन करण्यात येणार आहे. तसेच त्यांच्या जनसंपर्काची ओळख असलेल्या ‘जनता दरबार’ची प्रतिकृतीही येथे उभारली जाणार आहे. अजित पवार यांच्या जन्मापासून ते अखेरच्या श्वासापर्यंतचा जीवनप्रवास दृकश्राव्य माध्यमांच्या साहाय्याने उलगडण्यात येणार असून, त्यांच्या राजकीय, सामाजिक आणि विकासात्मक कार्याचा इतिहास भावी पिढ्यांसाठी जतन केला जाणार आहे.
बारामतीत येणाऱ्या प्रत्येक नागरिक आणि पर्यटकाला प्रेरणा मिळावी, तसेच अजित पवार यांचे कार्य आणि विकासाचा वारसा पुढील पिढ्यांपर्यंत पोहोचावा, या उद्देशाने अत्यंत भव्य आणि आकर्षक असे हे स्मारक उभारण्याचा निर्णय नगरपरिषदेने घेतल्याचे सभेत नमूद करण्यात आले. दरम्यान, विविध नगरसेवकांनीही या स्मारकासंदर्भात महत्त्वपूर्ण सूचना मांडल्या. स्वच्छता हा अजित पवार यांचा आवडता विषय असल्याने स्वच्छता कर्मचाऱ्यांसोबतचा त्यांचा पुतळा उभारण्यात यावा, त्यांच्या नावाने शिष्यवृत्ती योजना सुरू करावी तसेच त्यांना ‘महाराष्ट्र भूषण’ पुरस्कार देण्याची शिफारस राज्य शासनाकडे करण्यात यावी, अशा मागण्या नगरसेवकांनी सभागृहात केल्या.
उपनगराध्यक्षा श्वेता नाळे, मुख्याधिकारी पंकज भुसे यांच्यासह बहुसंख्य नगरसेवक या बैठकीस उपस्थित होते. अजित पवार यांचे स्मारक हा सर्व बारामतीकरांसाठी भावनिक आणि अभिमानाचा विषय असून, या प्रकल्पाला तातडीने मूर्त स्वरूप देण्यासाठी सर्व स्तरांवर प्रयत्न करण्यात येतील, अशी ग्वाही नगराध्यक्ष सचिन सातव यांनी सभागृहास दिली.
✍🏻मुख्य संपादक – सुरज देवकाते
