सिद्धिविनायक फाउंडेशनचा उपक्रम; शिक्षकांच्या वैचारिक व सर्जनशील लेखनाला मिळणार व्यासपीठ.
संपादक : सुरज देवकाते
बारामती (दि. ३) दिवंगत लोकनेते अजितदादा पवार यांच्या जयंतीनिमित्त सिद्धिविनायक फाउंडेशन, बारामतीचे अध्यक्ष तथा बारामती नगरपरिषदेचे नगरसेवक गणेश जोजारे यांच्या पुढाकाराने शिक्षकांसाठी ‘अजितदादा : एक प्रेरणापर्व’ या विषयावर राज्यस्तरीय निबंध स्पर्धेचे आयोजन करण्यात आले आहे. शिक्षकांच्या लेखनकौशल्याला चालना देणे, सर्जनशीलतेला प्रोत्साहन देणे आणि वैचारिक अभिव्यक्तीसाठी प्रभावी व्यासपीठ उपलब्ध करून देणे हा या उपक्रमाचा प्रमुख उद्देश असल्याचे आयोजकांनी सांगितले.
ही निबंध स्पर्धा रविवार, दि. ९ ऑगस्ट २०२६ रोजी सकाळी १० वाजता श्री आ. सातव हायस्कूल, बारामती येथे होणार असून शिक्षकांनी मोठ्या संख्येने सहभागी होऊन उपक्रम यशस्वी करावा, असे आवाहन करण्यात आले आहे.
स्पर्धेतील प्रथम, द्वितीय आणि तृतीय क्रमांकाच्या विजेत्यांना सन्मानचिन्ह, रोख बक्षीस व प्रमाणपत्र प्रदान करण्यात येणार आहे. तसेच उत्तेजनार्थ विजेत्यांनाही बक्षीस व प्रमाणपत्र देण्यात येईल. स्पर्धेत सहभागी होणाऱ्या प्रत्येक स्पर्धकाला सहभाग प्रमाणपत्र देऊन गौरविण्यात येणार असल्याने शिक्षकांमध्ये या उपक्रमाबाबत उत्सुकता निर्माण झाली आहे.या उपक्रमासाठी बारामतीचे नगराध्यक्ष सचिनशेठ सातव हे मार्गदर्शक म्हणून लाभले असून सोमनाथ गजाकस तसेच बारामती नगरपरिषदेतील सर्व समविचारी नगरसेवकांचे विशेष सहकार्य लाभत आहे. फाउंडेशनचे अध्यक्ष गणेश मोहन जोजारे, उपाध्यक्ष संजय नाना निंबाळकर, सचिव संजय बबन धुमाळ आणि खजिनदार परशुराम आप्पा वाकळे हे आयोजनाची जबाबदारी सांभाळत आहेत.
तसेच श्रीकांतशेठ झोरे व प्रतीक जोजारे हे संपर्क प्रमुख म्हणून कार्यरत असून, डॉ. सचिन साखरे (एमआयटी कॉलेज, पुणे) आणि श्री. विठ्ठल जोरी हे सहमार्गदर्शक म्हणून या उपक्रमाला मार्गदर्शन करणार आहेत.
सिद्धिविनायक फाउंडेशनच्या या अभिनव उपक्रमातून शिक्षकांना विचार मांडण्याची आणि लेखनातून प्रेरणादायी व्यक्तिमत्त्वावर प्रकाश टाकण्याची संधी मिळणार असून, स्पर्धेला बारामतीसह परिसरातील शिक्षकांकडून उत्स्फूर्त प्रतिसाद मिळेल, असा विश्वास आयोजकांनी व्यक्त केला आहे.
✍🏻मुख्य संपादक – सुरज देवकाते
