बारामती मेडिकल कॉलेजमधील भरती प्रक्रियेवर प्रश्नचिन्ह; स्थानिक भूमिपुत्रांवर अन्याय होत असल्याचा आरोप
स्टाफ नियुक्ती, उपचारातील हलगर्जीपणा आणि भरतीतील कथित गैरप्रकारांची उपमुख्यमंत्र्यांकडे चौकशीची मागणी
संपादक : सुरज देवकाते
बारामती : पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालय, बारामती येथील स्टाफ भरती प्रक्रियेत स्थानिक भूमिपुत्रांवर अन्याय होत असल्याचा आरोप करत तसेच रुग्णसेवेत होत असलेल्या कथित हलगर्जीपणाची चौकशी करून दोषींवर कठोर कारवाई करावी, अशी मागणी बारामती नगर परिषदेच्या आरोग्य समितीचे सभापती व नगरसेवक नवनाथ बल्लाळ यांनी उपमुख्यमंत्री सुनेत्रा पवार यांच्याकडे निवेदनाद्वारे केली आहे.
नवनाथ बल्लाळ यांनी दिलेल्या निवेदनात नमूद केले आहे की, बारामती तालुक्यातील रुग्णांना दर्जेदार आरोग्य सेवा मिळावी या उद्देशाने मेडिकल कॉलेज व सर्वोपचार रुग्णालयाची उभारणी करण्यात आली. मात्र, रुग्णालयातील कंत्राटी कर्मचाऱ्यांच्या भरतीमध्ये बारामती तालुक्यातील पात्र युवकांना डावलून इतर तालुक्यांतील उमेदवारांना प्राधान्य दिले जात असल्याची चर्चा आहे. त्यामुळे स्थानिक बेरोजगार युवकांमध्ये नाराजीचे वातावरण निर्माण झाले आहे.
निवेदनात पुढे म्हटले आहे की, नुकत्याच घडलेल्या एका अपघातग्रस्त रुग्णाच्या उपचारप्रकरणात ड्युटीवरील कर्मचाऱ्यांच्या अनुपस्थितीमुळे उपचारास विलंब झाल्याचा आरोप असून, या घटनेची सखोल चौकशी करून संबंधितांवर कठोर कारवाई करावी. तसेच रुग्णालयातील स्टाफ रुग्णसेवेसाठी जबाबदारीने काम करेल, यासाठी आवश्यक उपाययोजना करण्यात याव्यात. भरती प्रक्रियेत आर्थिक देवाण-घेवाण झाल्याच्या चर्चेचाही निवेदनात उल्लेख करण्यात आला असून, काही अधिकाऱ्यांच्या मर्जीतील उमेदवारांची नियुक्ती झाल्याचा आरोपही करण्यात आला आहे. मागील काही महिन्यांपासून भरती प्रक्रियेसंदर्भातील माहिती व कंत्राटी कर्मचाऱ्यांची यादी उपलब्ध करून देण्यात येत नसल्याचेही निवेदनात नमूद करण्यात आले आहे.
बारामती तालुक्यातील सर्व समाजातील पात्र युवकांना समान संधी मिळावी, भरती प्रक्रिया पूर्णपणे पारदर्शक व्हावी आणि स्थानिक भूमिपुत्रांवर अन्याय होणार नाही, यासाठी तातडीने योग्य ती चौकशी करून आवश्यक कारवाई करावी, अशी मागणी नवनाथ बल्लाळ यांनी केली आहे.
या निवेदनाची प्रत पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालयाच्या अधिष्ठात्यांनाही देण्यात आली असून, या प्रकरणाची निष्पक्ष चौकशी करून रुग्णालयातील आरोग्य सेवा अधिक सक्षम करण्याची अपेक्षा व्यक्त करण्यात आली आहे. या प्रसंगी नगरसेवक बिरजू मांढरे सदस्य अभ्यंगत मंडळ पुण्यश्लोक अहिल्यादेवी होळकर शासकीय महाविद्यालय सर्वोपचार रुग्णालय बारामती ,माजी नगरसेवक समीर चव्हाण, गौरव अहिवळे. निलेश मोरे, संकेत शिंदे उपस्थित होते
✍🏻मुख्य संपादक – सुरज देवकाते
