48 किलो गटात सुवर्णपदक, सोमंथळी किताब आणि गदेचा मानकरी ठरलेल्या पै. रिहान पठाणचा बारामती कुस्ती केंद्रात गौरव
संपादक : सुरज देवकाते
बारामती (दि:४) फलटण तालुक्यातील सोमंथळी येथे आयोजित जिल्हास्तरीय कुस्ती स्पर्धा 2026 मध्ये बारामती कुस्तीगीर संघ व बारामती कुस्ती केंद्राच्या पैलवानांनी दमदार कामगिरी करत आपला ठसा उमटविला. यामध्ये बारामती कुस्ती केंद्राचा होतकरू मल्ल पै. रिहान पठाण याने 48 किलो वजनी गटात उत्कृष्ट कुस्तीचे प्रदर्शन करत सुवर्णपदक पटकावले.
उपमुख्यमंत्री अजितदादा पवार यांच्या मार्गदर्शनाखाली बारामती कुस्तीगीर संघ कार्यरत असून ग्रामीण भागातील कुस्तीपटूंना दर्जेदार प्रशिक्षण, आधुनिक सुविधा आणि स्पर्धात्मक वातावरण उपलब्ध करून देण्याचे महत्त्वपूर्ण कार्य संघाच्या माध्यमातून केले जात आहे. त्यामुळेच बारामती परिसरातील अनेक मल्ल राज्य व राष्ट्रीय स्तरावर यशस्वी कामगिरी करत आहेत. पै. रिहान पठाणचे हे यश देखील त्याच सातत्यपूर्ण प्रयत्नांचे फलित मानले जात आहे.
स्पर्धेदरम्यान रिहानने आपल्या प्रतिस्पर्ध्यांवर मात करत अनेक चुरशीच्या व प्रेक्षणीय कुस्त्या जिंकल्या. त्याच्या दमदार कामगिरीमुळे त्याला संबंधित गटातील प्रतिष्ठेचा ‘सोमंथळी किताब’ बहाल करण्यात आला. तसेच गदेचा मानकरी होण्याचा बहुमानही त्याने मिळविला. रिहानच्या या उल्लेखनीय यशामुळे बारामतीच्या कुस्ती क्षेत्रात आनंदाचे वातावरण निर्माण झाले आहे.
या यशाबद्दल बारामती कुस्ती केंद्रात पै. रिहान पठाण याचा सत्कार व गौरव सोहळा मोठ्या उत्साहात पार पडला. यावेळी उपस्थित मान्यवरांनी रिहानच्या जिद्द, मेहनत आणि चिकाटीचे कौतुक करत भविष्यात राज्य व राष्ट्रीय स्तरावरही यश मिळविण्याच्या शुभेच्छा दिल्या.
सत्कार समारंभाला तालमीचे संचालक मंडळ, प्रशिक्षक, पालकवर्ग व कुस्तीप्रेमी मोठ्या संख्येने उपस्थित होते. यामध्ये वस्ताद पोपटराव गावडे, सुधाकर माने, वस्ताद भारत मदने, सामाजिक कार्यकर्ते अनिकेत मोहिते, संदीप गावडे, सचिनजी काळभोर, अभिजीत काळे, पै. अनिकेत चौधर, विवेक काळे, NIS कुस्ती कोच पै. सागर माने यांच्यासह अनेक मान्यवर उपस्थित होते.
यावेळी उपस्थितांनी बारामती कुस्ती केंद्राच्या सातत्यपूर्ण प्रशिक्षणामुळे ग्रामीण भागातील अनेक खेळाडूंना प्रगतीची संधी मिळत असल्याचे सांगितले. पै. रिहान पठाणच्या यशामुळे इतर युवा मल्लांनाही प्रेरणा मिळणार असून भविष्यात बारामतीचे नाव राज्य व राष्ट्रीय स्तरावर अधिक उंचावेल, असा विश्वास व्यक्त करण्यात आला.
✍🏻मुख्य संपादक – सुरज देवकाते
