लाखो रुपयांच्या गुंतवणुकीचा तपास सुरू; बँक खाती, डीमॅट अकाउंट, ट्रेडिंग व्यवहार आणि मनी ट्रेलची पोलिसांकडून पडताळणी.
संपादक : सुरज देवकाते
बारामती, (दि. ६) : शेअर मार्केट ट्रेडिंग व इन्व्हेस्टमेंटच्या नावाखाली आकर्षक व निश्चित परताव्याचे आमिष दाखवून नागरिकांकडून रक्कम स्वीकारल्याच्या आरोपावरून कार्तिक अरविंद नाळे व गौरव अरविंद नाळे (दोघे रा. डोर्लेवाडी, ता. बारामती, जि. पुणे) यांच्याविरुद्ध बारामती शहर पोलीस ठाण्यात दोन स्वतंत्र गुन्हे दाखल झाले आहेत. दोन्ही प्रकरणांचा तपास पोलिसांकडून सुरू असून संबंधित आर्थिक व्यवहारांची सखोल चौकशी करण्यात येत आहे.
पोलीस तपासात आरोपींनी नागरिकांकडून स्वीकारलेल्या रकमांचा नेमका वापर कसा झाला, संबंधित रक्कम प्रत्यक्ष शेअर मार्केटमध्ये गुंतविण्यात आली होती किंवा नाही, तसेच विविध बँक खाती, डीमॅट अकाउंट, ट्रेडिंग अकाउंट, ब्रोकर व्यवहार आणि निधीच्या हालचालींचा मनी ट्रेल तपासला जात आहे.
गु.र.नं. २४९/२०२६ मध्ये पहिला गुन्हा
बारामती शहर पोलीस ठाण्यात गु.र.नं. २४९/२०२६ हा गुन्हा भारतीय न्याय संहिता, २०२३ मधील कलम ३१६(२), ३१८, ३४०, ३(५) तसेच महाराष्ट्र ठेवीदारांच्या हितसंबंधांचे संरक्षण अधिनियम, १९९९ (MPID Act) चे कलम ३ अन्वये दाखल करण्यात आला आहे.
या प्रकरणात कार्तिक अरविंद नाळे, गौरव अरविंद नाळे तसेच BIG BULL INSTITUTE OF TRADING & FINANCE या नावाचा पोलीस अभिलेखात उल्लेख आहे. संबंधित व्यवसायाचे ठिकाण पंचायत समितीच्या मागे, आनंदनगर, भिगवण रोड, बारामती असे नमूद करण्यात आले आहे.
फिर्यादी सोहेल कुतुबुद्दीन इनामदार यांनी शेअर मार्केट ट्रेडिंग व गुंतवणुकीच्या माध्यमातून निश्चित परतावा देण्याचे आश्वासन देऊन रक्कम स्वीकारल्याचा आरोप केला आहे. या प्रकरणाच्या तपासादरम्यान इतर गुंतवणूकदार व आर्थिक व्यवहारांची माहितीही पोलिसांच्या निदर्शनास आली असून करारनामे, बँक व्यवहार व इतर आर्थिक कागदपत्रांची पडताळणी सुरू आहे.
गु.र.नं. ३६१/२०२६ मध्ये २२ लाखांच्या गुंतवणुकीचा आरोप
दरम्यान, रणजित बाळासो शिंदे (वय ४०, व्यवसाय शेती/मार्केटिंग, रा. शिंदेवाडी, ता. माळशिरस, जि. सोलापूर) यांच्या फिर्यादीवरून दिनांक ३ सप्टेंबर २०२६ रोजी बारामती शहर पोलीस ठाण्यात गु.र.नं. ३६१/२०२६ दाखल करण्यात आला आहे.
या गुन्ह्यात भारतीय दंड संहिता (IPC) कलम ४०६, ४०९, ४२० तसेच महाराष्ट्र ठेवीदारांच्या हितसंबंधांचे संरक्षण अधिनियम, १९९९ मधील कलम ३ व ४ अन्वये कारवाई करण्यात आली आहे.
फिर्यादीच्या म्हणण्यानुसार, कार्तिक नाळे व गौरव नाळे यांनी शेअर मार्केट ट्रेडिंग व्यवसायात गुंतवणूक केल्यास चांगला व निश्चित परतावा मिळेल, असे सांगून त्यांचा विश्वास संपादन केला. त्यानंतर स्वतःची बचत, कर्जातून मिळालेली रक्कम तसेच नातेवाईकांकडून उसने घेतलेली रक्कम अशा विविध स्रोतांतून एकूण २२ लाख रुपये गुंतविल्याचे फिर्यादीत नमूद आहे.
आरोपी कार्तिक नाळे यांच्या Axis Bank खात्यात तसेच गौरव नाळे यांच्या HDFC Bank खात्यात विविध तारखांना रक्कम जमा केल्याचे फिर्यादीत नमूद करण्यात आले आहे. एका व्यवहारात रोख रक्कम दिल्याचाही उल्लेख आहे. तसेच १ सप्टेंबर २०२२ रोजी पाच लाख रुपयांच्या गुंतवणुकीबाबत नोटरीकृत करारनामा करण्यात आला असून त्यात दरमहा दहा टक्के परतावा देण्याची अट असल्याचा दावा फिर्यादीने केला आहे.
सुरुवातीला काही रक्कम परतावा म्हणून मिळाल्याने आरोपींवरील विश्वास वाढला आणि त्यानंतर आणखी रक्कम गुंतविल्याचे फिर्यादीचे म्हणणे आहे. मात्र, पुढील काळात परतावा बंद झाल्याचा आरोप करण्यात आला. सप्टेंबर २०२३ नंतर पैशांबाबत विचारणा केली असता बँक खात्यात अडचण असल्याचे तसेच पैसे पुढे गुंतविले असून खाते लॉक झाल्याचे सांगण्यात आल्याचा दावा फिर्यादीने केला आहे.
या प्रकरणात यापूर्वी न्यायालयात Cri.M.A. No. 76/2024, Ranjit Balaso Shinde Vs. Kartik Nale and Anr. हा अर्ज दाखल करण्यात आला होता. न्यायालयाच्या आदेशानंतर सदर गुन्हा नोंदविण्यात आल्याचे पोलिसांनी सांगितले.
आर्थिक व्यवहारांचा ‘मनी ट्रेल’ तपासणार
दोन्ही गुन्ह्यांमध्ये आढळणाऱ्या व्यवहार पद्धतीचा तपास पोलिसांकडून करण्यात येत आहे. आरोपींनी विविध व्यक्तींकडून स्वीकारलेल्या रकमा कोणत्या बँक खात्यांमध्ये जमा केल्या, त्यानंतर त्या रकमांचे हस्तांतरण कुठे झाले, आरोपी किंवा संबंधित व्यक्तींच्या नावावर डीमॅट अथवा ट्रेडिंग खाती आहेत का, त्या खात्यांमधून प्रत्यक्ष शेअर बाजारातील व्यवहार झाले का, याची पडताळणी केली जात आहे.
याशिवाय बँक खाते स्टेटमेंट, KYC कागदपत्रे, UPI, IMPS, NEFT, RTGS व्यवहार, डीमॅट होल्डिंग्ज, ट्रेडिंग लेजर, ब्रोकर स्टेटमेंट, निधीचे लाभार्थी तसेच संबंधित व्यवसायाची नोंदणी याबाबतही माहिती संकलित केली जात आहे. आवश्यकतेनुसार संबंधित बँका, आर्थिक संस्था, डिपॉझिटरी व नियामक यंत्रणांकडून माहिती मागविण्याची कार्यवाही करण्यात येत आहे.
नाळे बंधू फरार; शोधासाठी पोलिसांची पथके कार्यरत
दोन्ही गुन्ह्यांतील आरोपी कार्तिक अरविंद नाळे व गौरव अरविंद नाळे सध्या फरार असल्याची माहिती पोलिसांनी दिली आहे. आरोपींचे संभाव्य वास्तव्य, संपर्कातील व्यक्ती, मोबाईल व इतर तांत्रिक माहितीच्या आधारे त्यांचा शोध घेण्यासाठी पोलिसांची पथके कार्यरत आहेत.
आरोपींचा शोध घेऊन पुढील कायदेशीर कारवाई करण्यात येणार असल्याचे पोलिसांनी सांगितले.
अशाच प्रकारे फसवणूक झालेल्या गुंतवणूकदारांना आवाहन
कार्तिक नाळे, गौरव नाळे किंवा त्यांच्या संबंधित BIG BULL TRADING / BIG BULL INSTITUTE OF TRADING & FINANCE अथवा अन्य ट्रेडिंग/इन्व्हेस्टमेंट व्यवसायाच्या माध्यमातून शेअर मार्केटमध्ये गुंतवणूक, निश्चित परतावा किंवा मासिक नफा देण्याचे आमिष दाखवून रक्कम स्वीकारण्यात आली असेल आणि संबंधित रक्कम किंवा परतावा अद्याप मिळाला नसेल, तर अशा नागरिकांनी बारामती शहर पोलीस ठाण्याशी संपर्क साधावा, असे आवाहन पोलिसांनी केले आहे.
तक्रारदारांनी शक्य असल्यास करारनामा, पावती, बँक स्टेटमेंट, चेक, UPI/NEFT/IMPS व्यवहाराचे तपशील, WhatsApp संभाषण, ई-मेल, जाहिराती, ट्रेडिंग स्क्रीनशॉट, डीमॅट किंवा पोर्टफोलिओ स्टेटमेंट तसेच इतर उपलब्ध पुरावे सोबत आणावेत, असेही पोलिसांनी स्पष्ट केले आहे.
ही कारवाई पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार व बारामतीचे उपविभागीय पोलीस अधिकारी चैतन्य कदम यांच्या मार्गदर्शनाखाली, बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांच्या नेतृत्वाखाली सुरू आहे. गु.र.नं. ३६१/२०२६ चा पुढील तपास पोलीस उपनिरीक्षक भंडारे करीत आहेत.
दरम्यान, नागरिकांनी अवास्तव किंवा हमखास परताव्याच्या आमिषाला बळी न पडता कोणतीही आर्थिक गुंतवणूक करण्यापूर्वी संबंधित व्यक्ती, संस्था आणि त्यांच्या नियामक नोंदणीची अधिकृत पातळीवर खातरजमा करावी, असे आवाहन बारामती शहर पोलिसांनी केले आहे.
✍🏻मुख्य संपादक – सुरज देवकाते
