पावसाळ्यामुळे गटारी तुडुंब; नागरिकांच्या आरोग्याचा प्रश्न गंभीर, तातडीच्या उपाययोजनांची संपदा चौधर यांच्याकडून मागणी.
संपादक: सुरज देवकाते
बारामती, (दि. १३) : बारामती नगर परिषदेच्या शरदचंद्रजी पवार सभागृहात शुक्रवारी (दि. १२) रोजी नगराध्यक्ष, उपनगराध्यक्ष, मुख्याधिकारी तसेच सर्व नगरसेवकांच्या उपस्थितीत सर्वसाधारण सभा पार पडली. या सभेमध्ये शहर व वाढीव हद्दीतील नागरिकांशी संबंधित विविध विकासकामांसह एकूण ७७ विषय सादर करण्यात आले. यापैकी ७५ विषयांना मंजुरी देण्यात आली, तर दोन विषयांना नामंजुरी देण्यात आली.
सभेदरम्यान वाढीव हद्दीतील रुई गावातील मूलभूत सुविधांचा प्रश्न ऐरणीवर आला. नगरसेविका संपदा चौधर यांनी रुई परिसरातील उघड्या गटारींची गंभीर समस्या सभेच्या निदर्शनास आणून दिली. पावसाळ्याच्या पार्श्वभूमीवर या गटारी तुडुंब भरून वाहत असून, त्यामुळे परिसरात मोठ्या प्रमाणात दुर्गंधी पसरत आहे. यामुळे नागरिकांच्या आरोग्याचा प्रश्न निर्माण झाला असून, तातडीने उपाययोजना करण्याची आवश्यकता असल्याचे त्यांनी सभेत नमूद केले.
रुई गावातील नागरिकांना अंत्यसंस्कारासाठी होणारी गैरसोय लक्षात घेता परिसरात स्वतंत्र स्मशानभूमी उभारण्यात यावी, अशी मागणीही त्यांनी केली. तसेच रुई गावातील डांबरीकरणाचा रस्ता तात्काळ मंजूर करून कामाला सुरुवात करावी, परिसरात आवश्यक त्या ठिकाणी पथदिवे बसविण्यात यावेत, अशी मागणी त्यांनी प्रशासनाकडे केली. याचबरोबर शहरातील विविध भागांमधील ड्रेनेज लाईनची दुरुस्ती करण्याचा मुद्दाही त्यांनी सभेत उपस्थित केला. काही भागांमध्ये सांडपाणी व्यवस्थेच्या समस्या निर्माण होत असून, नागरिकांना त्याचा त्रास सहन करावा लागत असल्याने या कामांना प्राधान्य देण्याची मागणी त्यांनी केली.
सभेमध्ये विविध विकासकामांवर सविस्तर चर्चा करण्यात आली. शहराच्या विकासाशी निगडित बहुसंख्य विषयांना मंजुरी मिळाल्याने आगामी काळात विविध विकासकामांना गती मिळणार असल्याचे मत यावेळी सदस्यांनी व्यक्त केले. वाढीव हद्दीतील भागांमध्ये मूलभूत सुविधा उपलब्ध करून देण्यावर भर देण्याची गरजही अनेक सदस्यांनी व्यक्त केली. दरम्यान, रुई गावातील उघड्या गटारी, रस्ते, पथदिवे आणि स्मशानभूमी यांसारख्या मूलभूत सुविधांचे प्रश्न सभेत प्रामुख्याने चर्चिले गेल्याने या समस्यांवर लवकरात लवकर कार्यवाही होण्याची अपेक्षा नागरिकांकडून व्यक्त केली जात आहे.
✍🏻मुख्य संपादक – सुरज देवकाते
