नवीन कार्यकारिणीची घोषणा; विद्यार्थ्यांच्या सर्वांगीण विकासासाठी काम करण्याचा निर्धार..
संपादक : सुरज देवकाते
बारामती (दि:२६) : विश्वरत्न डॉ. बाबासाहेब आंबेडकर मुलांचे वस्तीगृहाच्या कार्यकारिणीची बैठक उत्साहपूर्ण वातावरणात पार पडली. या बैठकीत संस्थेच्या नवीन कार्यकारिणीची सर्वानुमते निवड करण्यात आली. अध्यक्षपदी गणेश शिवराम सोनवणे यांची बिनविरोध निवड करण्यात आली असून, त्यांच्या नेतृत्वाखाली वस्तीगृहाच्या विकासाला नवी गती मिळेल, असा विश्वास उपस्थितांनी व्यक्त केला.
नवीन कार्यकारिणीमध्ये उपाध्यक्षपदी प्रतिभा संजय मोरे, सचिवपदी धनपाल विश्वनाथ भोसले, सहसचिवपदी सुशीलकुमार सोनवणे आणि खजिनदारपदी विजय नामदेव सोनवणे यांची सर्वानुमते निवड करण्यात आली. या निवडीप्रसंगी माजी अध्यक्ष अशोक (अण्णा) सोनवणे, संजय दादा मोरे तसेच दयानंद मिसाळ सर यांची प्रमुख उपस्थिती होती. उपस्थित मान्यवरांनी नवनिर्वाचित पदाधिकाऱ्यांचे अभिनंदन करून त्यांच्या भावी कार्यासाठी शुभेच्छा दिल्या.
नवनिर्वाचित अध्यक्ष गणेश शिवराम सोनवणे हे अनेक वर्षांपासून सामाजिक, शैक्षणिक आणि समाजहिताच्या विविध उपक्रमांमध्ये सक्रिय आहेत. समाजातील वंचित आणि गरजू घटकांसाठी त्यांनी सातत्याने केलेल्या कार्यामुळे त्यांच्याविषयी समाजात विश्वासाचे वातावरण निर्माण झाले आहे. त्यांच्या नेतृत्वगुणांचा, संघटन कौशल्याचा आणि सामाजिक बांधिलकीचा विचार करूनच त्यांची अध्यक्षपदी निवड करण्यात आल्याचे उपस्थितांनी सांगितले.
यावेळी मनोगत व्यक्त करताना अध्यक्ष गणेश सोनवणे यांनी वस्तीगृहाच्या सर्वांगीण विकासाला प्राधान्य देण्याचा निर्धार व्यक्त केला. विद्यार्थ्यांना अधिक दर्जेदार शैक्षणिक सुविधा उपलब्ध करून देणे, वस्तीगृहातील विविध सोयी-सुविधांमध्ये वाढ करणे तसेच संस्थेची सामाजिक बांधिलकी अधिक प्रभावीपणे जपण्यासाठी सर्व पदाधिकारी, सदस्य आणि समाजबांधवांना विश्वासात घेऊन पारदर्शक, लोकाभिमुख व विकासाभिमुख पद्धतीने काम केले जाईल, असे त्यांनी सांगितले.
नवीन कार्यकारिणीच्या निवडीमुळे संस्थेच्या विकासाला नवी दिशा मिळणार असून विद्यार्थ्यांच्या हितासाठी अधिक प्रभावी उपक्रम राबविले जातील, असा विश्वास उपस्थित मान्यवरांनी व्यक्त केला. :::
✍🏻मुख्य संपादक – सुरज देवकाते
