योगाभवन विस्तार, संत वीरशैव कक्कय्या महाराजांचा अर्धपुतळा, मारुती मंदिराचे जीर्णोद्धार, वाचनालय व समाजमंदिर उभारणीसह आठ प्रमुख मागण्या सभागृहात..!
संपादक : सुरज देवकाते
बारामती, (दि. २३) : जवाहरनगर परिसरातील गेल्या चार दशकांपासून प्रलंबित असलेल्या विविध समाजोपयोगी विकासकामांबाबत स्वीकृत नगरसेवक सोमनाथ गजाकस यांनी बारामती नगरपरिषदेच्या सर्वसाधारण सभेत आक्रमक भूमिका घेत प्रशासनाचे लक्ष वेधले. प्रभाग क्रमांक १२ मधील नागरिक तसेच कक्कय्या ढोर समाजाच्या सामाजिक, सांस्कृतिक, शैक्षणिक व धार्मिक गरजा लक्षात घेऊन विविध विकासकामांना तातडीने मंजुरी देऊन मार्गी लावण्याची मागणी त्यांनी नगराध्यक्ष सचिनशेठ सातव यांच्याकडे निवेदनाद्वारे केली.
जवाहरनगर येथील विद्यमान योगाभवनाचे विस्तारीकरण करून त्याचे सुशोभीकरण करण्यात यावे, तसेच या कामामध्ये आकर्षक मेघडंबरी उभारून कक्कय्या ढोर समाजाचे आराध्यदैवत महाप्रसादी श्री संत वीरशैव कक्कय्या महाराज यांचा अर्धपुतळा स्थापित करण्यात यावा, अशी मागणी करण्यात आली आहे. सन १९७५ मध्ये नगरपरिषदेच्या माध्यमातून बांधण्यात आलेल्या जवाहरनगर येथील मारुती मंदिराचे जीर्णोद्धार करण्यात यावा. तसेच मंदिरामागील बाजूस योग्य नियोजन करून परिसर मोकळा करण्यात यावा आणि धार्मिक, सामाजिक व सांस्कृतिक कार्यक्रमांसाठी प्रशस्त व सुसज्ज सभामंडप उभारण्यात यावा, अशीही मागणी करण्यात आली. याशिवाय विद्यार्थ्यांसाठी आधुनिक सुविधा असलेली अभ्यासिका व सार्वजनिक वाचनालय उभारणे, कक्कय्या ढोर समाजाच्या विविध उपक्रमांसाठी “कक्कय्या भवन समाज मंदिर” उभारणे, जवाहरनगर परिसरातील सर्व रस्त्यांचे किमान सहा मीटर रुंदीकरण करून दर्जेदार डांबरीकरण करणे, विद्यमान योगाभवनास “महाप्रसादी श्री संत वीरशैव कक्कय्या महाराज योगाभवन” असे नामकरण करणे तसेच देसाई इस्टेट परिसरातील ढोर कॉलनी शाळेचे नाव बदलून “बा.न.प. कक्कय्या महाराज विद्यालय” असे करण्याची मागणीही नगरसेवक गजाकस यांनी केली.
या सर्व मागण्या समाजहित, शैक्षणिक प्रगती, धार्मिक श्रद्धा आणि परिसराच्या सर्वांगीण विकासाच्या दृष्टीने महत्त्वाच्या असून, त्यावर सकारात्मक विचार करून आवश्यक प्रशासकीय मान्यता देण्यात यावी, अशी आग्रही भूमिका त्यांनी सभागृहात मांडली. गेल्या ४० वर्षांपासून प्रलंबित असलेल्या या विकासकामांना अखेर गती मिळावी, अशी अपेक्षा जवाहरनगर परिसरातील नागरिक आणि कक्कय्या ढोर समाजाकडून व्यक्त करण्यात येत आहे.
✍🏻मुख्य संपादक – सुरज देवकाते
