राष्ट्रवादी काँग्रेसच्या नगरसेवकांसह सर्व सदस्यांचा एकमुखी पाठिंबा; सभागृहात तीव्र नाराजी व्यक्त
संपादक : सुरज देवकाते
बारामती : बारामती नगर परिषदेच्या शरदचंद्रजी पवार सभागृहात नगराध्यक्ष, उपनगराध्यक्ष, मुख्याधिकारी तसेच सर्व नगरसेवकांच्या उपस्थितीत सर्वसाधारण सभा पार पडली. सभेच्या प्रारंभी उपमुख्यमंत्री अजितदादा पवार यांच्याविषयी करण्यात आलेल्या कथित बेताल वक्तव्याच्या निषेधाचा विषय सभागृहात उपस्थित करण्यात आला.
यावेळी राष्ट्रवादी काँग्रेस पक्षाचे प्रतोद विशाल हिंगणे यांनी निषेधाचा ठराव मांडला.या ठरावास नगरसेवक सोमनाथ गजाकस यांनी अनुमोदन देत हात वर करून संबंधित घटनेचा निषेध व्यक्त केला. सभागृहातील सदस्यांनीही या निषेध ठरावाला पाठिंबा दर्शवत एकमुखी मंजुरी दिली.
यावेळी आरोग्य सभापती नवनाथ बल्लाळ यांनी तीव्र शब्दांत प्रतिक्रिया व्यक्त करत, अजितदादा पवार यांच्याविषयी अपशब्दांचा वापर झाल्याबद्दल जाहीर निषेध नोंदविला. तसेच बांधकाम सभापती अमर धुमाळ यांनीही संबंधित वक्तव्याचा निषेध करत आपली भूमिका स्पष्ट केली. सभेदरम्यान राष्ट्रवादी काँग्रेस पक्षाच्या सर्व नगरसेवकांसह इतर सदस्यांनीही निषेध ठरावाला एकमुखी पाठिंबा दिला. त्यामुळे सभागृहात संबंधित वक्तव्याविरोधात तीव्र नाराजी व्यक्त करण्यात आली. दरम्यान, सभेच्या सुरुवातीलाच हा विषय चर्चेला आल्याने काही काळ वातावरण गंभीर झाले होते. मात्र, सर्व सदस्यांनी एकमताने निषेध व्यक्त करत सभेचे पुढील कामकाज नियमितपणे सुरू ठेवले.
✍🏻मुख्य संपादक – सुरज देवकाते
