बारामतीत दुर्मिळ ‘हरियाल’ पक्षाला जीवदान; ‘ग्रीन वर्ल्ड फाउंडेशन’ची कौतुकास्पद कामगिरी
संपादक : सुरज देवकाते
बारामती: येथील मोरगाव रस्त्यावरील सोळस्कर वस्ती परिसरात नुकताच महाराष्ट्राचा राज्यपक्षी असलेला दुर्मिळ ‘हरियाल’ (Yellow-footed Green Pigeon) पक्षी जखमी अवस्थेत आढळून आला. निसर्गाचा हा सुंदर अनमोल ठेवा संकटात असल्याचे पाहताच, बारामतीमधील ‘ग्रीन वर्ल्ड फाउंडेशन’च्या टीमने तातडीने धाव घेत या पक्षाला यशस्वीरित्या जीवदान दिले. त्यांच्या या तत्परतेमुळे एका दुर्मिळ पक्षाचे प्राण वाचले असून परिसरात संस्थेचे कौतुक होत आहे.
सर्पमित्र आदित्य पारखे आणि श्लोक माने यांनी तात्काळ घटनास्थळी धाव घेतली. त्यांनी अत्यंत काळजीपूर्वक या पक्षाचे रेस्क्यू (बचाव) केले. पक्षी जखमी असल्याने त्याला उपचार करण्यात आले.
‘हरियाल’ पक्षाबाबत सविस्तर माहिती देताना संस्थेचे सर्पमित्र अमोल जाधव यांनी सांगितले की, ‘हरियाल’ हा प्रामुख्याने झाडांवर राहणारा पक्षी असून तो कधीही जमिनीवर पाय ठेवत नाही, अशी लोकभावना आहे. हा पक्षी महाराष्ट्राचा ‘राज्यपक्षी’ म्हणून ओळखला जातो. गडद हिरवा आणि पिवळसर रंग असलेल्या या पक्षाचे मुख्य अन्न वडाची आणि पिंपळाची फळे हे असते. पर्यावरण संतुलनात आणि बीजप्रसारात या पक्षाची भूमिका अत्यंत महत्त्वाची आहे.
सध्याच्या काळात वाढत्या शहरीकरणामुळे हे पक्षी दुर्मिळ होत चालले आहेत. ग्रीन वर्ल्ड फाउंडेशनने केलेल्या या यशस्वी रेस्क्यू ऑपरेशनमुळे बारामतीच्या पर्यावरण वर्तुळातून संस्थेचे आणि सर्पमित्रांचे विशेष आभार मानले जात आहेत.
✍🏻मुख्य संपादक – सुरज देवकाते
