दिवंगत उपमुख्यमंत्री अजितदादा पवार यांच्या जयंतीनिमित्त आयोजित शिबिरात उत्स्फूर्त प्रतिसाद; महिला उपनगराध्यक्षा श्वेता नाळे यांचे रक्तदान
प्रतिनिधी : सुरज देवकाते
बारामती (दि. १९) : दिवंगत उपमुख्यमंत्री अजितदादा पवार यांच्या जयंतीनिमित्त राष्ट्रवादी काँग्रेस पक्षाच्या वतीने शारदा प्रांगण येथे आयोजित करण्यात आलेल्या महा रक्तदान शिबिराला नागरिकांचा उत्स्फूर्त प्रतिसाद लाभला. या सामाजिक उपक्रमात बारामती नगरपालिकेच्या महिला उपनगराध्यक्षा श्वेता नाळे यांनी रक्तदान करून समाजापुढे प्रेरणादायी आदर्श ठेवला.
रक्तदान हे सर्वोच्च समाजसेवेचे कार्य असून गरजू रुग्णांना जीवनदान देण्याचे प्रभावी माध्यम आहे. या भावनेतून आयोजित करण्यात आलेल्या या महा रक्तदान शिबिरात युवक, महिला, ज्येष्ठ नागरिक तसेच विविध क्षेत्रातील मान्यवरांनी मोठ्या संख्येने सहभाग घेत रक्तदान केले.
यावेळी राज्याच्या उपमुख्यमंत्री सुनेत्रा पवार यांनी शिबिराला भेट देत रक्तदात्यांचे कौतुक केले. महिला उपनगराध्यक्षा श्वेता नाळे यांनी स्वतः रक्तदान करून सामाजिक बांधिलकी जपल्याबद्दल सुनेत्रा पवार यांनी त्यांचे विशेष आभार व्यक्त केले. अशा उपक्रमांमुळे समाजात रक्तदानाबाबत जनजागृती होऊन अधिकाधिक नागरिक पुढे येतील, असा विश्वासही त्यांनी व्यक्त केला. राष्ट्रवादी काँग्रेस पक्षाच्या वतीने आयोजित या महा रक्तदान शिबिरातून सामाजिक उत्तरदायित्वाचा संदेश देण्यात आला. रक्तदानासाठी पुढाकार घेणाऱ्या सर्व रक्तदात्यांचे आयोजकांनी आभार मानत, भविष्यातही अशाच समाजोपयोगी उपक्रमांचे आयोजन करण्यात येणार असल्याचे सांगितले.
✍🏻मुख्य संपादक – सुरज देवकाते
