बारामती दूध संघाच्या संचालक मंडळाची महत्त्वपूर्ण बैठक
संपादक : सुरज देवकाते
बारामती (दि५): बारामती दूध उत्पादक संघाच्या चेअरमन व व्हाईस चेअरमन पदाची निवड शुक्रवारी बिनविरोध पार पडली. चेअरमनपदी निंबोडी येथील किशोर भगवानराव फडतरे तर व्हाईस चेअरमनपदी आंबी येथील पुरुषोत्तम शिवाजीराव गाढवे यांची एकमताने निवड करण्यात आली.
संघाचे विद्यमान चेअरमन संजय रामचंद्र कोकरे आणि व्हाईस चेअरमन दत्तात्रय सदाशिव वावगे यांनी आपल्या पदाचा राजीनामा दिल्यानंतर रिक्त झालेल्या पदांसाठी ही निवड प्रक्रिया पार पडली. महाराष्ट्र राज्याच्या उपमुख्यमंत्री सुनेत्रा पवार यांच्या सूचनेनुसार नव्या पदाधिकाऱ्यांची निवड करण्यात आली.
बारामती दूध संघाची प्रगती ही दिवंगत उपमुख्यमंत्री अजितदादा पवार यांच्या मार्गदर्शनामुळे शक्य झाली असून, उपमुख्यमंत्री सुनेत्रा पवार, राज्यसभा खासदार पार्थ पवार तसेच युवानेते जय पवार यांचे संघाला वेळोवेळी मोलाचे मार्गदर्शन लाभत असल्याची भावना उपस्थितांनी व्यक्त केली. निवडणूक प्रक्रियेचे कामकाज निवडणूक अधिकारी श्रीकांत श्रीखंडे, अध्यासी अधिकारी तथा सहाय्यक निबंधक, सहकारी संस्था (दुग्ध), पुणे यांनी पार पाडले. निवडणूक प्रक्रिया शांततेत आणि सर्वसंमतीने पूर्ण झाली.
यावेळी राष्ट्रवादी काँग्रेस पक्षाचे जिल्हाध्यक्ष संभाजी होळकर, तालुकाध्यक्ष संदीप बांदल, महिला तालुकाध्यक्षा वनिताताई लडकत, बाजार समितीचे सभापती विनायक गावडे, पक्षाचे विविध पदाधिकारी, दूध संघाचे सर्व संचालक मंडळ, व्यवस्थापकीय संचालक डॉ. योगेश राणे, उपमहाव्यवस्थापक अमोल चव्हाण तसेच संघाशी संबंधित मान्यवर मोठ्या संख्येने उपस्थित होते.
नवनिर्वाचित चेअरमन किशोर फडतरे आणि व्हाईस चेअरमन पुरुषोत्तम गाढवे यांचे उपस्थितांनी अभिनंदन करून पुढील वाटचालीस शुभेच्छा दिल्या. संघाच्या प्रगतीसाठी शेतकरी, दूध उत्पादक सभासद आणि संचालक मंडळ यांच्या सहकार्याने अधिक प्रभावीपणे काम करण्याचा निर्धार नवनिर्वाचित पदाधिकाऱ्यांनी व्यक्त केला.
“बारामती दूध संघ हा शेतकरी आणि दूध उत्पादकांच्या हितासाठी कार्यरत असून संघाच्या सर्वांगीण विकासासाठी प्रामाणिकपणे काम करू. सभासदांचा विश्वास आणि वरिष्ठांचे मार्गदर्शन याच्या बळावर संघाला अधिक उंचीवर नेण्याचा प्रयत्न राहील.”
— किशोर फडतरे, नवनिर्वाचित चेअरमन.
✍🏻मुख्य संपादक – सुरज देवकाते
