संपादक : सुरज देवकाते
बारामती : महाराष्ट्र प्रदेश काँग्रेस कमिटीचे प्रदेशाध्यक्ष हर्षवर्धन सपकाळ Harshvardhan Sapkal यांच्या कार्यपद्धतीवर महाराष्ट्र प्रदेश काँग्रेस ओबीसी विभागाचे उपाध्यक्ष रोहित बनकर यांनी तीव्र नाराजी व्यक्त करत जाहीर निषेध नोंदविला आहे. पुणे जिल्ह्यातील संघटनात्मक नियुक्त्यांमध्ये विविध समाजघटकांतील पात्र व पक्षनिष्ठ कार्यकर्त्यांना डावलून मनमानी पद्धतीने नियुक्त्या करण्यात आल्याचा आरोप त्यांनी केला आहे.
रोहित बनकर यांनी प्रसिद्धीस दिलेल्या निवेदनात म्हटले आहे की, ओबीसी, एससी, एसटी, अल्पसंख्यांक, व्हीजे-एनटी तसेच विविध जाती-धर्मातील अनेक कार्यकर्त्यांना संघटनात्मक नियुक्त्यांमध्ये योग्य संधी न देता काही मोजक्या व्यक्तींनाच प्राधान्य देण्यात आले. या प्रकारामुळे पक्षातील अनेक कार्यकर्त्यांमध्ये असंतोषाचे वातावरण निर्माण झाले असून, पक्षाच्या सर्वसमावेशक धोरणाला धक्का बसत असल्याचा त्यांचा दावा आहे.
या प्रकरणाची पक्षश्रेष्ठींनी गांभीर्याने दखल घेऊन सखोल चौकशी करावी आणि आवश्यक ती कारवाई करावी, अशी मागणी बनकर यांनी केली आहे. तसेच ही बाब पक्षाचे वरिष्ठ नेते Rahul Gandhi यांच्या निदर्शनास आणून देणार असल्याचेही त्यांनी सांगितले. दरम्यान, या आरोपांवर महाराष्ट्र प्रदेश काँग्रेस कमिटी किंवा प्रदेशाध्यक्ष हर्षवर्धन सपकाळ यांची अधिकृत प्रतिक्रिया मिळालेली नाही.
✍🏻मुख्य संपादक – सुरज देवकाते
